Ўзбекистонда пахта ва тўқимачилик саноати изчил ривожланиб бормоқда. Соҳа ютуқлари Шавкат Мирзиёев томонидан амалга оширилаётган ислоҳотлар билан бевосита боғлиқ.

Ҳудудлардаги табиий хом ашё, ишлаб чиқариш ва меҳнат салоҳиятидан оқилона фойдаланиш, саноат тармоқларини жадал ривожлантириш орқали аҳолининг бандлиги, даромадлари ва турмуш даражасини янада ошириш муҳим аҳамият касб этади.

Касби туманида экспортга ихтисослашган йирик корхонани ишга тушириш режалаштирилган. Ушбу лойиҳа Римпех Полимер МЧЖ томонидан “Пахта ва сунъий толадан аралаш ип ишлаб чиқариш ҳамда текстил чиқиндиларини қайта ишлашни ташкил этиш” инвестиция лойиҳаси доирасида амалга оширилмоқда. Лойиҳанинг умумий қиймати 24,5 млн еврони ташкил этади.

Муротжон Азимов корхонага ташриф буюриб, қурилиш ишлари билан яқиндан танишди.

Маълум қилинишича, корхона йилига ўртача 8 000 тонна тайёр маҳсулот ишлаб чиқаради. Экспорт ҳисобига йиллик 14,0 млн АҚШ доллари даромад олиниши кутилмоқда. Корхонани 2026 йил сентябрь ойида ишга тушириш режалаштирилган бўлиб, лойиҳа натижасида 500 нафар фуқаро иш билан таъминланади.

Маълум бўлишича, вилоят ҳокими Муротжон Азимов бошчилигидаги Қашқадарё вилояти делегациясининг **Германия**га амалий ташрифи доирасида тиббиёт, таълим ва инновациялар соҳасида қатор муҳим учрашувлар ташкил этилди.

Делегация Ҳайделберг–Манҳайм университет клиникалари тармоғи бош директори, профессор Ҳаннс-Петер Кнаэбел билан учрашиб, таълим ва соғлиқни сақлаш соҳасида халқаро ҳамкорликни ривожлантириш масалаларини муҳокама қилди.

Шу билан бирга, ташриф доирасида ҳудуднинг йирик саноат корхоналари вакиллари ҳам иштирок этди. Хусусан, Khilal Group раҳбаряти делегация таркибида қатнашиб, пахтачилик ва тўқимачилик саноатини ривожлантириш, замонавий текстиль технологияларини жорий этиш ҳамда экспорт салоҳиятини оширишга қаратилган қатор ташаббусларни илгари сурди.

Жумладан:
— пахта хомашёсини чуқур қайта ишлаш ва қўшимча қиймат яратиш;
— ип-калава ва тайёр текстиль маҳсулотлари ишлаб чиқариш ҳажмини кенгайтириш;
— Европа бозорларига экспорт географиясини кенгайтириш;
— янги иш ўринлари яратиш орқали аҳоли бандлигини таъминлаш;
— ҳудуд саноат инфратузилмасини замонавийлаштириш.

Бу ташриф Қашқадарё вилояти ва Германия ўртасида инвестиция, саноат ва технология соҳаларидаги ҳамкорликни янги босқичга олиб чиқиши кутилмоқда.

Пахта-тўқимачилик саноатида илғор технологиялар ва замонавий ишлаб чиқариш тажрибасини ўрганиш мақсадида Khilal Group делегацияси Ҳиндистоннинг йирик текстиль ускуналари ишлаб чиқарувчи корхонаси — Lakshmi Machine Works Limited таклифига биноан 7 кунлик амалий ташриф билан мазкур корхонада бўлиб қайтди.

Ташриф давомида делегация ишлаб чиқариш жараёнлари, замонавий ип-калава ускуналари, автоматлаштирилган бошқарув тизимлари, сифат назорати ва “Business Excellence” модели асосида йўлга қўйилган самарали менежмент тизими билан яқиндан танишди.

Жумладан:

— замонавий прядил ва текстиль ускуналари технологиялари;

— ишлаб чиқаришни рақамлаштириш ва автоматлаштириш ечимлари;

— Lean-management ва харажатларни камайтириш усуллари;

— маҳсулот сифати ва иш самарадорлигини ошириш амалиёти;

— ходимлар малакасини ошириш ва корхона бошқарув маданияти.

Мазкур ташрифда:

— Khilal Tex раҳбари Комилжон Набиев,

— Khilal Vortex раҳбари Худоёр Исроилов,

— ишлаб чиқариш бўйича раҳбар Самад Турдеев

фаол иштирок этиб, корхоналарда замонавий технологияларни жорий этиш, ишлаб чиқариш қувватларини модернизация қилиш ва халқаро ҳамкорликни кенгайтириш юзасидан музокаралар олиб бордилар.

Ушбу амалий сафар Khilal Group корхоналарида ишлаб чиқариш самарадорлигини ошириш, маҳсулот сифатини халқаро стандартларга мослаштириш ҳамда экспорт салоҳиятини янада кенгайтиришга хизмат қилиши кутилмоқда.